( مصافحة أولى) - بساتين من الحب -

هى بدايات العرس الجميل - حينما تدخل الى دنيا جديدة تألفها - وتحبها
وتعشقها ..اتمنى أن اكون اضافة
---------------------------------------------------------------------------------------------------------
جميلة فى هذا المنتدى الرائع ..
-----------------------------


( بساتين .. من الحب ..)



(1)

بقالدك فى صباحا ضى .. واضمك زى أحلى جنى ..
واقولك شواقى رايد الرى .. وانا العطشان وقربك مى
وحاتك انتى ياعينى .. بحبك مو كلاما .. نى
كلاما من وريدا حى ..
اريتك بس تعرفى البى ..
والقى دواى - لوكان كى ..


(2)


صباح ناسا يقابلوكا ويقالدوكا ..
بسيماتهم ترد الروح يسالموكا ..
وبشاشة الدنيا فوق محياهم ..
يساءلوكا ...ويناشدوكا ..
وليهم حضرة ..وقتين يجوكا ويجاملوكا
محبة والفة ..مساحات حب مملوكا..
ديل عز الارض ..ديل السادة وملوكا
ومن غيرهم تبقى الدنيا معجوكا ..
ومن غير ديل ..يجوك الناس يعزوكا


(3)


عليك بسأل ..
ولو جافيتى مابزعل ..
وأوجد ليك فى الاعذار وأتجمل ..
واشيل الريده ..ليك أشتل ..
بقت بستان جميل ..وشتل
شتول الريده ..تبقى أمل
مهما البينا .. كان وحصل ..
لأنك انتى ..مطيرة الخير وقت تهطل



(4)


زى السحاب ماطره ...
ومتل زمنا جميل حاضره ..
حنينى اليك ..مو كلمات تمر عابره..
انتى الكلمة .. والخاطره ..
وانتى زى شذى الازهار دوام عاطره
رويحتى من حنين اشواقا ماصابره ..
وحاتك مابدق قلبى ..الا ليك ياناضره ..


(5)



ضمينى ليك ..
خلينى انسان فى عينيك ..
دفينى بى راحة يديك ..
لما السلام يرسم ملامح وجنتيك .
وكل اوصاف الجمال الكامنه فيك ..
وعند لحظات التلاقى ..
احس بالفرحة تتوهج عليك ..
الشوق بحر ..وانا الغريق بين ضفتيك ..
ياريتنى اغرق ..مادمت عارف موتى فيك ..


-----------------


مع كل الحب والود ..